-----------------------------------------------

Skólaárið 2009 - 2010

Vikan 7.des.-11.des.

Við höldum áfram að læra um aðventuna, við hittum vinabekki okkar sem er 7. bekkur. Föndrum fyrir jólin og syngjum jólalög.

Höldum áfram að vinna ýmis verkefni í íslensku og stærðfræði.

Heimanám:Lestur.

Vikan 30.nóv.-4.desember

Í þessari viku lærum við um aðventuna og förum í kirkju á fimmtudag. Skreytum gluggana í stofunni og syngjum jólalög og sálma.

Í íslensku erum við að læra um sérnöfn og samnöfn.

Í stærðfræði erum við að leggja saman og geyma og draga frá.

Heimanám: Lesa,lesa,lesa.

Vikan 23. - 27. nóvember

Senn líður að jólum og við erum byrjuð í kristinfræði.  Þar erum  við að lesa sögur úr Gamla testamentinu og munum síðan læra um aðventuna.

Í íslensku erum við að læra um nafnorð, sérnöfn - samnöfn.  Í stærðfræði erum við að læra um flatarmál og ummál, ólík form ásamt hefðbundnum reikniaðgerðum.

Við fáum heimsókn frá Brunavörnum Árnessýslu, en þeir koma árlega í heimsókn í skólann og heilsa uppá 3. bekkinga.

Á föstudaginn verður skreytingardagur í skólanum.  Hefðbundið skólastarf fellur niður og við skreytum skólann okkar.  Það er í boði að koma með sparinesti ( ekki gos eða nammi ) t.d. smákökur og snúða.

Heimanám þessa viku er blað með orðadæmum og lesskilningsverkefni. Þessu skal skila fimmtudaginn 26. nóvember.

Skólaárið 2008-2009
 

Gleðilegt sumar og takk fyrir skemmtilegan vetur!

Hafið það sem allra best og sjáumst hress í haust :-)

Bestu kveðjur,
Steinunn Alda, Tinna og Valgerður

Vikan 19.-22.maí.

Við höldum áfram með vorþema og tengjum það íslenskuvinnu. Erum að taka til og klára ýmis verkefni. Ef veður er gott ætlum við að nota það til útiveru og læra um vorið.

Heimanám: Lestur og stílabók.

Vikan 11.-15. maí

Við höldum áfram að vinna með vorið, lærum um farfuglana, syngjum vorlög og lesum vorljóð. Í stærðfræði vinnum við með mælingar og munstur.Námsmat verður áfram í þessari viku.

Heimanám : Lestur og stílabók/vinnubók.

Vikan 4. - 8. maí

Við ætlum að byrja að vinna með vorþema og tengjum það íslenskuvinnu. Í stærðfræði erum við að vinna með hundruð, tugi og einingar og mælingar. Við erum einnig farin að huga að námsmati.

Heimanám vikunnar: Lestur + stílabók/vinnubók. Einnig er lesskilningsverkefni sem fer heim á mánudaginn og á að skila á föstudeginum 8. maí.

Vikan 27. apríl - 1. maí

Gleðilegt sumar!

Við höldum áfram að vinna með lesskilning í íslensku og mælingar og samlagningu tuga í stærðfræði.

Miðvikudaginn 29. apríl verða bekkjarmyndatökur. Til að panta bekkjarmynd og/eða einstaklingsmyndir er nauðsynlegt er að skila skráningarblaði og kvittun með til umsjónarkennara í síðasta lagi þriðjudaginn 28. apríl. Að öðrum kosti er litið svo á að ekkert sé pantað fyrir það barn.

Föstudaginn 1. maí er frí í skólanum og skólavistun lokuð.

Heimanám vikunnar: Aðaláhersla lögð á lestur og vinnu í stílabók/vinnubók.

Vikan 20. apríl - 24. apríl

Sumardagurinn fyrsti er frídagur og daginn eftir er Íþróttadagur í skólanum (vera klædd eftir veðri og hafa nesti í léttum bakpoka).

Í stærðfræði erum við að vinna með mælingar og samlagningu tuga. Í íslensku erum við að leggja áherslu á lestur og lesskilning á fjölbreyttan hátt.

Heimanám vikunnar: Lestur og stílabók/vinnubók og Línan 1-4 bls. hámark.

Gleðilega páska!

Við héldum árshátíðina okkar í morgun í Baulu. Þar voru 3 leikrit á dagskrá og í lokin söng allur hópurinn saman tvö lög. Allir stóðu sig með mikilli prýði og þökkum við öllum sem komu að horfa á okkur kærlega fyrir komuna.

Nú tekur við páskafrí en skólinn byrjar aftur þriðjudaginn 14. apríl.

Vikan 30. mars - 3. apríl

Við erum á fullu að æfa fyrir árshátíðina en hún verður föstudaginn 3. apríl kl. 10 í Baulu (íþróttahúsinu).

Við ætlum að lesa og læra um páskana í kristinfræði og vinnum áfram í stærðfræði og íslensku.

Tinna er í burtu vegna skólans 3 daga í næstu viku.

Heimanám vikunnar: Við leggjum alla áherslu á að börnin lesi á hverjum degi heima og vinni í stílabók/vinnubók.

Vikan 23. - 27. mars

Þessi vika verður helguð árshátíðarundirbúningi. Nákvæm tímasetning á árshátíðinni sjálfri verður auglýst síðar.

Heimanám vikunnar: Við leggjum alla áherslu á lestur og stílabækur/vinnubækur þessa vikuna. Endilega látið umsjónarkennara vita þegar stílabækurnar klárast. Ekki verður annað heimanám í þessari viku.

Ath! Nýtt heimanám kemur heim á föstudögum og skilist á fimmtudögum.

Vikan 16. - 20. mars

Við höldum áfram að vinna með ljóð og málshætti tengda veðrinu.

Í stærðfræði erum við enn að vinna með mínusinn og hitamælingar.

Heimanám vikunnar: Allir eiga að vinna bls. 2 og 3 í Línunni, þeir sem klára það auðveldlega mega gera bls. 4 og 5 líka. Einnig er lestur og stílabók/vinnubók.

Vikan 9. - 13. mars

Íslenskuvinna þessarar viku tengist veðurþemanu sem við erum að vinna í núna. Við ætlum að skoða ljóð og málshætti tengda veðrinu. Gaman væri að horfa á veðurfréttir og ræða um veðrið og veðurspánna.

Í stærðfræðinni höldum við áfram með mínusinn og aðra stærðfræðivinnu.

Heimanám vikunnar: Við leggjum áherslu á LESTURINN (lágmark 5 sinnum í viku) og að skrifa í stílabókina eða vinna í vinnubók (þeir sem eru með vinnubók mega geyma stílabókina í bili). Ekki verður annað heimanám í þessari viku.

Ath! Nýtt heimanám kemur heim á föstudögum og skilist á fimmtudögum.

Vikan 2. - 6. mars

Á mánudaginn 2. mars verða foreldraviðtöl.  Hefðbundið skólastarf liggur niðri en nemendur mæta með foreldrum og hitta umsjónarkennarann sinn.

Í stærðfræðinni ætlum við að einbeita okkur að mínus, ásamt því að rifja stöðugt upp tugakerfið.

Við erum einnig að spá í veðrið og hvað það hefur uppá að bjóða.

Heimanám vikunnar er stærðfræði, sögubók og lestur.  Í sögubók skal segja frá skemmtilegum furðufatadegi/öskudegi.

Vikan 23. - 27. febrúar

Enn vinnum við í námsmati.

Á bolludaginn má koma með bollur í nesti.

Á öskudeginum er starfsdagur og þá mæta nemendur ekki í skólann.

Föstudaginn 27. febrúar verður furðufatadagur og þá mega nemendur koma í búningum í skólann.

Heimanám í þessari viku er lestur, stílabók og skriftarbók. Lágmark 1 bls en hámark 4 bls.

Vikan 16. - 20. febrúar

Við erum að vinna áfram í námsmati og vinnum áfram með veðurþemað. Í stærðfræðinni erum við að vinna með hundruð, tugi og einingar og erum að æfa okkur í að reikna með hjálp 100 talna töflu.

Heimanám í þessari viku er lestur, stílabók og sögubók (fyrirmæli inni í bókinni).

Vikan 9. - 13. febrúar

Nú er námsmat framundan og vinnum við það jafnt og þétt með annarri vinnu. Næsta þemaverkefni verður veðurfar í víðum skilningi og munum við byrja á því í næstu viku. Í stærðfræði höldum við áfram með hundruð, tugi og einingar og samlagningu.

Heimanám í þessari viku er lestur, stílabók og 3 verkefnablöð með talnalínu.

Vikan 2. - 6. febrúar

Við ætlum að ljúka umfjöllun okkar um árstíðirnar, gömlu mánaðaheitin og þorrann. Þessa vikuna erum við að vinna með hundruð, tugi og einingar, teljum peninga og leggjum saman í talnahúsi.

Heimanám vikunnar er 2 blöð í stærðfræði, lestur og stílabók.

Vikan 26. - 30. janúar

Í íslensku erum við enn að vinna með árstíðirnar og ætlum að skoða gömlu mánaðarheitin, sögur og hjátrú því tengt. Þorrinn er byrjaður, við syngjum þorralög og skoðum gamla matargerð ;-)    

Heimanám vikunnar er sögubók, skrifa sögu um veturinn og lestur.

Vikan 19. - 23. janúar

Nú erum við að skoða mánuði, vikur og daga í stærðfræðinni. Við erum að byrja með Einingu 4 og vinnum með árstíðirnar í samfélagsfræði og íslensku. 

Heimavinna er lestur og skrifa í stílabók.

Vikan 12. - 16. janúar

Gleðilegt nýtt ár og takk fyrir gott samstarf á liðnu ári. Við erum að koma okkur í gang eftir gott frí og ýmislegt skemmtilegt þarf að ræða eftir jólafríið :-) Við erum að vinna með þrettándann og allt sem tengist honum, álfa og sögur þeim tengdum. Þessi vinna heldur áfram í þessari viku. Í stærðfræði stefnum við á að klára Einingu 3.

Við minnum á lesturinn og stílabókina.

Vikan 15. - 19. desember

Við höldum áfram að vinna með jólasveinana og boðskap jólanna þ.e. fæðingu frelsarans. Á þriðjudeginum 16. desember förum við í kirkjuheimsókn kl: 11.30. Á fimmtudeginum 18. des ætlum við að horfa á videó með 1. bekk. Þennan dag verður einnig í boði að koma með jólasmákökur í nesti.

Við höfum eignast vini í 6. bekk og með þeim förum við í söngstund á þriðjudagsmorgninum og munum einnig dansa með þeim á jólaballinu. 

Litlu jólin verða föstudaginn 19. des.  kl: 10 - 11.45. 

Við óskum ykkur gleðilegra jóla með kærum þökkum fyrir gott samstarf á árinu. Sjáumst aftur 6. janúar 2009.

Vikan 8. - 12. desember

Ferðin í Alviðru tókst mjög vel hjá öllum hópum.  Þar var margt skemmtilegt að sjá, m.a. fengu nemendur að handfjatla ál, bleikjur og kanínur sem þarna eiga heima. Skemmtilegur jólahlutur var föndraður og á hann kannski eftir að rata í einhverja jólapakka ;-) Við fengum okkur göngutúr upp í hlíðar Ingólfsfjalls og hlustuðum eftir álfum sem búa þar í steinum.

Við vinnum áfram með kristinfræðina og boðskap jólanna, föndrum, syngjum og eigum notalega daga.

Við höfum eignast vini í 6. bekk og ætlum að hitta þá í vikunni. 

Söngstund í Fjallasal verður á miðvikudagsmorgun, en þá hittist allur skólinn og syngur saman jólalög.

Þrátt fyrir jólaundirbúning er nauðsynlegt að allir lesi heima á hverjum degi og skrifi orð í stílabókina sína.

Vikan 1. - 5. desember

Við vinnum áfram í stærðfræði og íslensku munum við lesa jólasögur og syngja jólalög. Í kristinfræði byrjum við að lesa um aðventuna og boðskap jólanna.

Við ætlum að fara í Alviðru í spennandi jóladagskrá síðustu þrjá daga vikunnar. Nauðsynlegt er að allir séu með nesti, t.d. drykk og samloku.

Lagt verður af stað um 8:30 og komið heim kl. 12 (ca.).

Miðvikudaginn 3. des fara Sverðfiskar
Fimmtudaginn 4. des fara Vatnableikjur
Föstudaginn 5. des fara Geddur

Tinna umsjónarkennari í Geddum verður í fríi v/jólaprófa á miðvikudag og fimmtudag.

Síðasta heimanámið fyrir jól er stærðfræðiblað í grænu möppunni.

Vikan 24. - 28. nóvember

Við höldum aðeins áfram með geimverurnar og geiminn og með því ætlum við að skoða og rifja upp -ei- og -ey-.

Föstudaginn 28. nóvember er skreytingardagur og þá verður skólinn skreyttur hátt og lágt. Við vonum að sjálfsögðu að foreldrar sjái sér fært að kíkja á okkur og eiga góða samverustund með börnunum í skólanum.

Heimanám þessa viku er lestur og lestrarverkefnið - lágmark 2-3 skipti í stílabókina. Einnig fer sögubókin heim og í hana á að skrifa sögu um geimveru.

Vikan 17. - 21. nóvember

Mánudaginn 17. nóvember er foreldradagur og mæta nemendur með foreldrum sínum í viðtal hjá umsjónarkennara.

Á þriðjudeginum hefjum við miðönnina. Við ætlum að vinna meira með geimverur og lesa bókina BéTveir.

Heimanám er lestur og lestrarverkefni í stílabók (kynnt í foreldraviðtali).

Vikan 10. - 14. nóvember

Þessa vikuna erum við í námsmati í íslensku og stærðfræði.

Ýmsir viðburðir verða hjá okkur í næstu viku.

Mánudaginn 10. nóvember mun Sunnulækjarskóli byrja á að bjóða nemendum upp á hafragraut í morgunmat. Grauturinn góði er í boði frá kl. 7:50-8:05, þannig að allir ættu að komast svo á réttum tíma inn í fyrsta tíma kl. 8:10. Hafragrauturinn er ókeypis fyrir nemendur.

Þriðjudaginn 11. nóvember fáum við skáld í heimsókn, en þá koma Kristín Helga Gunnarsdóttir og Halldór Baldursson til okkar og ræða um Fíusól.

Starfsdagur verður 13. nóvember, þann dag fellur kennsla niður.

Föstudaginn 14. nóvember er Tónlist fyrir alla og þá kemur Eyjólfur G. Eyvindsson í heimsókn til okkar.

Heimanám þessa vikuna er lestur og í sögubók á að skrifa sögu um góðan vin.

Vikan 3. - 7. nóvember

Í síðustu viku unnum við Rauða kross verkefnið.  Aðilar frá Rauða krossinum komu og fylgdust með og ræddu við nemendur.  Verkefnið gekk mjög vel og höfðu aðstandendur verkefnisins það á orði hversu prúð og þæg nemendur hefðu verið :-)

Í stærðfræðinni erum við að æfa okkur í frádrætti og að leggja saman tugi.

Heimanám vikunnar eru stærðfræðiblöð þar sem nemendur þurfa að leggja saman og draga frá.   Til að öðlast sem bestan talnaskilning er best að láta nemendur teikna, telja og skrá dæmin. 

Vikan 27. - 31. október

Á mánudeginum 27. október er vetrarfrí. 

Í síðustu viku fengu kennarar skólans heimsókn frá Rauða krossinum.  Markmið heimsóknarinnar var að fara í gegnum verkefni sem við ætlum að vinna með nemendum skólans á þriðjudaginn 28 okt.  Verkefni þetta miðar að því kenna börnum að vinna sig útúr erfiðum tilfinningum sem geta sótt á okkur t.d. í kjölfar jarðskjálfta. 

Enn verðum við að vinna verkefni tengd Uppeldi til ábyrgðar.  Nú þegar höfum við farið með nemendum í gegnum hlutverk hvers og eins, hvert er hlutverk kennarans og hvert er hlutverk nemandans.

Ekkert heimanám verður þessa viku.   Tinna umsjónarkennari hjá Geddum verður fjarverandi vegna skólans þessa viku.  Steinunn og Valgerður verða með Geddurnar.

Myndir af dótadeginum eru komnar á heimasíðuna okkar .

Hafið það gott í vetrarfríinu og vonandi koma allir endurnærðir til starfa á þriðjudaginn.

Vikan 20. - 24. október

Í stærðfræði ætlum við að halda áfram með flokkun, mælingar og form. Í íslensku erum við að rifja upp stafi og hljóð. Við erum líka að æfa okkur áfram í ritun, skrift og ljóðum. Við höldum áfram að vinna með Uppeldi til ábyrgðar. Upplagt er að ræða heima hvert hlutverk nemanda er og af hverju erum við að ganga í skóla.

Vetrarfrí hefst í næstu viku á föstudeginum 24. október og til mánudagsins 27. október. Við minnum á að Skólavistun er lokuð þessa daga.

Heimanám vikunnar er 1 skriftarblað og 2 stærðfræðiblöð. Skila á fimmtudaginn.

Vikan 13. - 17. október

Í stærðfræðinni erum við að vinna með flokkun, mælingar og form. Í íslensku vinnum við áfram með ritun, skrift og ljóð. Í samfélagsfræði ætlum við að vinna verkefni út frá Uppeldi til ábyrgðar s.s. búa til bekkjarreglur og ræða hlutverk nemenda og kennara.

Heimanám vikunnar er lestur í lestrarbók og sögubók á að skrifa sögu um myndina sem búið er að líma inn.

Vikan 6. - 10. október

Enn erum við að vinna með mælingar og vasareikna í stærðfræði. Í íslensku erum við að vinna með skriftina, áhersla er lögð á að draga rétt til stafs og rétt hlutfall stafa (hástafi h, l, k og lágstafi a, e, g o.fl.).  Við erum að þjálfa okkur í ritun, stór stafur, lítill stafur, bil á milli orða og punktur.   Við ætlum að læra vísuna "Runki fór í réttirnar" í skólanum.

Heimanám vikunnar eru tvö blöð í stærðfræði og eitt í skrift.  Við hvetjum ykkur til að lesa a.m.k. fimm sinnum í viku.

Vikan 29. september - 3. október

Við erum að ljúka haustþemanu í þessari viku.
Í stærðfræði vinnum við áfram með tölur og talnaskilning, vasareikni og mælingar.
Í íslensku höldum við áfram með stóran staf, punkt og bil á milli orða og bætum við spurningamerkinu.

Við minnum á heimalesturinn og heimanámið, sem er frjálst í sögubók og stærðfræðiblöð. Skila á fimmtudögum.
 

Vikan 22. - 26. september

Við erum að vinna áfram með haustið og haustverkin.  Í stærðfræði erum við að vinna með tölur upp í 50.  Í íslensku leggjum við áherslu á stóran staf, punkt og bil á milli orða.

Haustþing kennara er á föstudag og þann fellur skóli niður.

Vikan 15. - 20. september

Í þessari viku ætlum við að læra um haustið og haustverk, fara út í rigninguna :-) í göngutúra, leiki og skapandi starf. Í stærðfræði erum við að vinna með súlurit, talningu, plús og mínus. Í íslensku erum við að skrifa sögur og ljóð um haust.

Munið eftir að lesa heima og í þessari viku eru skil á fyrsta heimanámi, sem er sögubók. Heimanám fer heim á föstudögum og skilist á fimmtudögum viku síðar.

Vikan 8. - 12. september

Nú eru allir komnir með lestrarbók og við hvetjum ykkur til að vera dugleg að láta nemendur lesa heima. Við erum að vinna með haustið og erum að komast í gang með stærðfræði- og íslenskuvinnu. Innileikfimi hefst í þessari viku, leikfimisföt og handklæði verða því að fylgja nemendum þá daga.  Nauðsynlegt er að merkja allt sem hægt er að merkja.  Þar sem margir eru í eins göllum og jafnvel ómerktum er gott að merkja með merkitússi á hvítu miðana innaná. Sundpokar eru margir eins og því gott að skrifa nafn barns utaná pokann.

Vikan 18. - 22. ágúst

Velkomin aftur í skólann! Á morgun er skólasetning og eiga börnin í 2. bekk að mæta kl. 9:00. Skóli hefst síðan skv. stundatöflu föstudaginn 22. ágúst.

Hlökkum til að sjá ykkur!

Steinunn, Tinna og Valgerður

-----------------------------------------------

Skólaárið 2007-2008

Vikan 12.- 16. maí

Mánudagurinn 12. maí er annar í hvítasunnu  og því frí í skólanum.  Við erum að klára þemað um líkamann.  Við erum líka að læra au og ei.  Við taka ýmis vortengd verkefni.  Föstudaginn  16. maí er íþróttadagur í skólanum, nánari upplýsingar koma er nær dregur. Heimanámi er hér með lokið í vetur, við minnum samt á að nauðsynlegt er að lesa á hverjum degi til skólaloka. 

Vikan 5.-9. maí.

Í Þessari viku vinnum við áfram með líkamann og lærum ýmis hugtök og heiti tengt honum. Í stærðfræði erum við að vinna með samlagningu og frádrátt.

Heimanám vikunnar eru tvö stærðfræðiblöð. Allir að muna að lesa heima.

Vikan 21.-25.apríl

Í næstu viku verður þemaverkefni allsráðandi.   Við ætlum að einbeita okkur að því hvernig við viljum að skólinn okkar sé, að öllum líði vel og hver og einn beri ábyrgð á eigin hegðun, sem er samkvæmt verkefni því sem skólinn vinnur að.  Verkefnið kallast "Uppeldi til ábyrgðar" . 

Heimanám vikunnar er sögubók.  Sagan á að fjalla um vináttuna í máli og mynd.  Muna að lesa heima :-)

Vikan 14.-18. apríl.

Við vinnum áfram með líkamann og lærum um hendur og fætur og skoðum ýmsa málshætti sem tengjast því. Í stærðfræði erum við að læra um mínus.Í íslensku vinnum við áfram með söguna  "Dýrin í Tónadal".

Heimavinnan er stærðfræðiblað og það er mikilvægt að teikna og skrá vegna þess að síðar verða flóknari verkefni.Og allir að muna að lesa.

Vikan 7. - 11. apríl

Vinna með líkamann heldur áfram.  Í stærðfræði erum að kynna fyrir nemendum merkið mínus og hvað það stendur fyrir.  Nýja lesbókin okkar heitir "Dýrin í Tónadal" og þar erum við að skoða og læra y og ý. 

Heimavinna þessa viku er stærðfræðiblað.  Nauðsynlegt er að lesa yfir dæmin með nemendum til að tryggja að þau skilji til hvers er ætlast.  Skil á heimavinnu er 10. apríl.  Við minnum á að allir þurfa að láta lesa einu sinni á dag.

Vikan 31. mars - 4. apríl

Þessa viku verðum við að vinna áfram með líkamann.  Við ætlum að tala um beinagrindina og innri líffæri.   Við skoðum líka lengdir,  fæðingarlengdina okkar og núverandi lengd og mælum ýmsa hluti í sentimetrum.

Vikan 10. - 14. mars

Þessi vika fer að mestu í árshátíðarundirbúning og verður sýning miðvikudaginn 12. mars kl:  10.30 í íþróttahúsi Sunnulækjarskóla.  Foreldar eru velkomnir ásamt ömmum og öfum.

Við ætlum líka að vinna áfram með bókstafinn e og svo föndrum við eitthvað páskalegt.

Vikan 3. - 7. mars

Við þökkum ykkur fyrir góð og gagnleg viðtöl á foreldradegi.      Við verðum að vinna með líkamann þessa viku og ætlum að skoða betur húðina okkar og frumur.  Einnig ætlum við að læra stafinn e.

Nú byrjum við á heimanámi sem afhendist á föstudögum og á að skila á fimmtudegi viku seinna.   Heimanám þessarar viku er upplýsingasöfnun um lengd og þyngd við fæðingu, gaman er ef allir koma með mynd af sér nýfæddum/nýfæddri, og eitt stærðfræðiblað þar sem verið er að æfa merkin "minna en og "meira en"  og munið að Goggi gráðugi vill alltaf borða stóru töluna.  Heimanámi á að skila í síðasta lagi 6. mars.

Vikan 25. - 29. febrúar.

Á mánudeginum 25. febrúar eru foreldraviðtöl.                        Við ætlum að læra stafina ú og ð í vikunni.  Við erum að byrja þemaverkefni um líkamann, þar sem unnið verður á fjölbreyttan hátt.  Í stærðfræði skoðum við tölur, talningu og skráningu.  Heimavinna kemur heim í fyrsta sinn á föstudag og verður þannig framvegis.

Vikan 18.-22. febrúar.

Þessa viku ætlum við að læra stafina þ og ö og lesa ljóðið Sögull og Þögull eftir Þórarinn Eldjárn. Unnið verður með ljóðið og stafina á ýmsan hátt. Anna Guðríður hjúkrunarfræðingur kemur til okkar að fræða okkur um tannvernd og síðan verður unnið þema um "líkamann" á næstu vikum. Í stærðfr. erum við að skoða tugi og einingar.

Vikan 11. - 15. febrúar

Þessa vikuna erum við að vinna í námsmati.  Við tökum læsiskönnun og könnum stærðfræði.  Á mánudaginn er 1 1 2 dagurinn og þá koma til okkar hjúkrunarfræðingar og fræða okkur um fyrstu hjálp. 

Vikan 4. - 8. febrúar

Það verður mikið um að vera í þessari viku.   Við höldum áfram með söguna "Afi minn í sveitinni" og vinnum með stafina u og x út frá henni. Í stærðfræði vinnum við áfram með samlagningu, talningu og skráningu. Öskudagurinn verður fjörugur.  Allir eru hvattir til að koma í búningum í skólann og við verðum með leiki og fjör hér á svæðinu okkar.

Vikan 28.janúar - 1.febrúar

Við byrjum á nýrri gæðasögu sem er að þessu sinni Afi minn í sveitinni. Við vinnum með stafina æ og d í þessari viku og þjálfum lestur á ýmsan hátt.  Álfaverkefnið er að klárast og  börnin hafa þegar gert sér álfa úr leir sem þau mála í þessari viku og koma fyrir í álfabyggðinni okkar.

Í stærðfræði vinnum við með talningu og skráningu.  Í síðustu viku vorum við að vinna með peninga.  Við hvetjum ykkur til að eiga smápeninga í krukku og lofa börnunum að telja þá og átta sig á gildi þeirra.

Vikan 21. - 25. janúar 2008.

Við höldum áfram að vinna með söguna "Gunnhildur og Glói" og leggjum inn stafina n og g.  Við vinnum áfram í álfaverkefninu og erum að þjálfa lestur á ýmsan hátt.     Við minnum á mikilvægi þess að láta þau börn sem eru með lestrarbók lesa heima.   Einnig er mjög mikilvægt að halda áfram að lesa bækur fyrir börnin og ræða innhaldið og e.t.v. útskýra orðin sem koma fyrir.      Í stærðfræði erum við að æfa samlagningu og ýmislegt fleiri.

Vikan 14.-18. janúar.

Við ætlum að lesa nýja sögu" Gunnhildur og Glói"og læra stafina é og v. Við vinnum áfram með álfaþema og heimsækjum Álfa og tröllasafnið á Stokkseyri  föstudaginn 18. jan. Í stærðfræði erum við að vinna með einingar og tugi og erum að æfa okkur að leggja saman tölur undir 10.

Vikan 7. - 11. janúar 2008

Gleðilegt ár og takk fyrir það gamla.  Þökkum gott samstarf á liðnu ári.  Nú á nýju ári hefur fjölgað um tvo nemendur hjá okkur.  Kolbrún Björk bættist í hóp Sverðfiska og Tómas Örn í hóp Gedda.  Við bjóðum þau velkomin.  Þessa vikuna verður hjá okkur álfaþema og við ætlum að læra stafinn f.   

Vikan 17.-20. des.

Við höldum áfram að vinna með boðskap jólanna. Föndrum og höfum frið og ró. Á fimmtudaginn verða litlu jólin kl.10. Þá sjáum við helgileik og dönsum í kringum jólatré. Við fáum kakó og flatbrauð. Skólinn er búinn kl. 12. En þau sem eru á skólavist fá að borða þar. Skólinn hefst aftur 4.jan.  Bestu óskir um Gleðileg jól. Þökkum samstarfið.

Vikan 10.-14. desember.

Við  vinnum áfram með stafina. Við ætlum að læra um aðventuna og boðskap jólanna.  Á miðvikudaginn förum við í kirkjuna og hittum sóknarprestinn okkar. Á fimmtudaginn kemur 5. bekkur í heimsókn og verður okkar vinabekkur. Á föstudaginn ætlum við að skoða Álfa og tröllasafnið á Stokkseyri. Síðan munum við hafa rólegheit og rifja upp jólalögin.

Vikan 3. - 7. desember.

Við ætlum að lesa jólasögu fyrir nemendur og nota hana til að kynna

stafina b og j.  Í Einingu vinnum við með raðtölur og speglun.  Upplagt umræðuefni heima er að ræða um jólasveinana hver kemur fyrstur og hver er annar o.s.frv.  Hjúkrunarfræðingur kemur og gefur öllum flúor.  Við ætlum að skreyta allt rýmið okkar og munum kappkosta við að hafa allt á rólegum nótum.

Vikan 26. - 30. nóvember.

Við ætlum að lesa nýjar bækur í hópunum.  Við verðum að vinna með stafina h, p, b og j, ásamt þekktum sérhljóðum fram að jólum.  Í Einingu byrjum við á jólaþemanu og tökum fyrir raðtölur.  Við tökum einnig fyrir mynstur og speglun.                                                                Á fimmtudeginum förum við í heimsókn í Setrið, við hittum krakkana sem eru þar og föndrum stjörnur.   Á föstudeginum ætlum við að vinna með 2. og 3. bekk við að skreyta gluggana í Klettum    (stjórnunarálma skólans).                                                               

Vikan 19.-23.nóvember

Við ætlum að lesa nýja bók og læra stafinn h, við vinnum með hann á ýmsan hátt og rifjum upp aðra stafi. Í stærðfræði erum við að vinna með samlagningu (+ og =). Einnig ætlum við að vera dugleg í lísleikni t.d. æfa að rétta upp hönd og tala einn í einu, hlusta á aðra og segja frá. Síðan rifjum við upp bekkjarreglur sem hópurinn kom sér saman um.               

Vikan 12. - 16. nóvember

Við ætlum að vinna áfram með bókstafina k og i.  Á miðvikudeginum verður frí hjá nemendum vegna starfsdags kennara sem verða þá að vinna í námsmati.                                                                                          Á föstudeginum er Dagur íslenskrar tungu og þá munum við kynna ljóðskáldið Jónas Hallgrímsson og kenna þeim vísu eftir hann.  Þennan dag verður einnig dótadagur, þá má hver nemandi koma með eitt leikfang.  Stærð leikfangsins miðast við að það komist ofan í skólatösku.   Athugið að senda nemendur ekki með viðkvæm leikföng.

Vikan 5.-9.nóvember

Við lesum nýja bók sem heitir, Kerling vill hafa eitthvað fyrir snúð sinn.  Við ætlum að læra stafina k og i. Í stærðfræðinni erum við að læra um hugtökin minna en,stærra en og jafnt og.  Gott væri að ræða þessi hugtök heima.  Í þessari viku og næstu verður kennaraneminn Helga Bergsdóttir í læri hjá Sverðfiskum.

Vikan 29. október - 2. nóvember

Þegar við komum úr vetrarfríi höldum við áfram að vinna með stafina t og o.  Höldum áfram að vinna í Einingu.

Vikan 22. - 26. október 

Við lesum nýjan texta sem er þulan  "Einn og tveir".  Við ætlum að læra stafina t og o   og ræða um orðin sem koma fyrir í þulunni.  Við vinnum með stafina á ýmsan hátt.  Vinnum áfram með Einingu og þar erum við að skoða tölur og talnagildi.

Leikskólakennaranemar koma til okkar og verða frá mánudegi til fimmtudags.  Á föstudeginum er vetrarfrí  :-)

Vikan 15. - 19. október

Við höldum áfram að vinna með á og r á margan skemmtilegan máta.  Í stærðfræði eru við að vinna með talningu, talnagildi og tölur.  Byrjum á Einingu eða apabókinni sem þau kjósa að kalla hana :-).  Förum í göngutúr og æfum okkur í umferðareglum og leikum okkur.  Erum að móta okkar bekkjarreglur og æfa okkur í umgengni í mötuneyti.

Á mánudeginum koma til okkar tveir kennaranemar Helga og Hrönn, þær koma úr Þorlákshöfn.  Þær verða hjá okkur næstu fimm vikur og munu mestmegnis vera með Gunnhildi og hennar hóp.

Vikan 8. - 12. október 2007

Við tökum fyrir nýja gæðasögu og leggjum inn stafina á og r.  Fjölbreytt vinna verður í sambandi við þá t.d. ávaxtastimplun.  Við ætlum að skoða vel hvað orð er, setning, punktur og spurningarmerki.  Á þriðjudeginum fáum við  fjóra leikskólakennaranema frá Háskólanum á Akureyri í heimsókn.   Við höldum áfram í talnaskrift.

Vikan 1. - 5. október 2007

Við ætlum að vinna áfram með söguna "En hvað það var skrýtið" á mjög fjölbreyttan hátt s.s. með orðabingó, samtæðuspili, orðaskuggum og föndra stafina a og m.  Við ætlum að æfa talnaskrift upp í 10 og þeir sem eru lengra komnir æfa það.  Við þjálfum áfram + og =. Áframhaldandi vinna með haustið og þuluna "Karl tók til orða". 

Vikan 24. - 28. september 2007

Í þessari viku ætlum við að lesa söguna En hvað það var skrýtið og vinna út frá henni með stafina m og a.  Sagan býður upp á vinnu með rím. Í stærðfræðinni ljúka við Kátt er í Kynjadal sem ekki tókst að klár í síðustu viku.  Einnig ætlum við að vinna með hugtökin +      og =. Við ætlum okkur að nota haustið og fara út og tína laufblöð og vinna með þau.  Þula vikunnar er Karl tók til orða. 

Á föstudaginn fáum við gesti.  Andrea Gylfadóttir og Björn Thoroddsen koma og syngja fyrir okkur.

Vikan 17. - 21. september 2007

Í þessari viku ætlum við að fara út og tína laufblöð og finna smádýr sem við skoðum síðan og vinnum úr.  Við vinnum áfram með stafina s, l, ó og í.  Við höfum lesið bókina "Tumi og Tóta" og vinnum áfram með hana þ.e. skoðum hugtök og merkingu ýmissa orða sem þar koma fyrir og leitum að stöfunum sem við höfum lært innan textans.

Kátt er í Kynjadal (stærðfræðibók), stefnum á að ljúka þeirra bók í vikunni.

Föstudaginn 21. september er frí í skólanum vegna þings kennara á Flúðum.

Þriðjudagur 4. september 2007

Í dag fengu allir hópar heimsókn frá skólahjúkrunarfræðingi, henni Önnu Guðríði Gunnarsdóttur, og eins og nærri má geta höfðu allir einhverjar "sárasögur" að segja.   Anna Guðríður mun koma inn til okkar hálfsmánaðarlega og gefa öllum flúor.